سوبر ماركت ,,,,, حبنا !!!!

المكان : الجامعه - (النجيـله التى تتوسط الحرم)





شلة كبيرة من الأصدقاء تجتمع معا في جلستها المفضلة
بعد أن انتهوا من "النميمة" الصباحية، وبعد أن فرغوا من لعب "x" "o" يدخلون
في نقاش حامي الوطيس -أيوه الوطيس- هذه هي تفاصيله:



"منة": أنا شخصيا شايفة إن فتى أحلامي لازم يكون في وسامة "هاني سلامة" ورجولة "عمرو زكي"
وشياكة "هاني البحيري" وحرفنة "أبو تريكة"!
"هيثم":

ده على أساس إن حضرتك واقفة في سوبر ماركت وبتطلبي كوكتيل رجالة!

"نسمة": ما عندها حق ما تقول لنا إنت ياخويا مواصفات فتاة أحلامك إيه؟

"حازم": عنك إنت يا "هيثم".. أنا هأتكلم نيابة عنك وعن جيلي كله..
لازم طبعا تكون في جمال "غادة عادل"
وأنوثة "وفاء عامر" وبتلبس هدوم زي "رزان"!
"داليا": اتفضل يا سيدي أهو الأخ كمان راح نفس السوبر ماركت.. بيقول لك عاوزها بتلبس زي "رزان".. "رزان"!
"أحمد":
خسئتم!.. إيه التفاهة دي.. مش ملاحظين إن كل مواصفاتكم
تليفزيونية بحتة.. وكلهم يا إما ممثلين
وممثلات على لعيبة كورة.. وكأن مفيش في الدنيا غيرهم..

"نسمة": ماشي يا عم المثقف.. خلينا إحنا ناس وحشين وقول لنا إنت يا
سيدي السوبر ماركت بتاعك بيبيع إيه؟
"أحمد":
فتاة أحلامي.. ياه.. فتاة أحلامي.. ياه.. فتاة أحلامي.. ياه.. فتاة أحلامي.. ياه.. فتاة أحلامي.. يـ........
"حازم":
ياه! خلاص عرفنا إن فتاة أحلامك ياه.. أيوه تركيبتها جاية منين
يعني؟

"أحمد":
ياه!.. طبعا لازم تكون بريحة الكتب.. حاجة كده طالعة من
روايات "نجيب محفوظ" وقصص "يوسف إدريس"
ومسرحيات "علي سالم".. فيها جدعنة أنوثة وبنت بلد..
زي بطلة قصة (الحب فوق هضبة الهرم) كده..
"منة":
آه حضرتك عاوز تعمل معاها فوازير (عالم ورق ورق) يعني!

"محمود":
يا جماعة ده ذوق الراجل يبقى لازم تحترموه.. وبعدين هو
بيتكلم صح فعلا.. طب أنا مثلا نفسي أتجوز واحدة تكون مهتمة
بالسياسة.. زي مثلا "هيلاري كلينتون" ولاّ "سارة بالين"
ولا حتى زي "شاهيناز النجار" قبل ما تعتزل السياسة..
دي بصراحة الواحدة اللي لازم أرتبط بيها.. تخليني كده
دايما مصحصح ومفوق وعاوز أتفوق
دايما عشان ننجح مع بعض!
"نسمة":
وإن شاء الله في الآخر تشرفوا مع بعض في السجن!

"عمرو":
بس تصدقوا إن عمري ما جه في بالي إن فتاة أحلامي تكون
ممثلة ولا مذيعة ولا حتى واحدة من بتوع رفع الأثقال!

"داليا":
أومال كنت بتحلم إنها تكون زي الست "كوثر" بتاعة الجرجير
اللي على أول الشارع ها ها!
"عمرو":
ها ها! ومبسوطة قوي كده ليه.. طب تصدقي فعلا إني كنت
أحيان كتيرة بأفكر إنها تكون زي الست "كوثر" بتاعة الجرجير؛ لأنها
مكافحة وعندها قدرة تخليها تتحمل الكوارث والمصائب بعزيمة وقوة
مبهرة.. هو حد يطول يلاقي واحدة زي كده اليومين دول..
وكل جيل البنات بعيد عنك عامل زي ورق البسكويت..
يعني حتى مش جامدين زي البسكويت اللي شوية شاي سخن بيدوبوه!
"ندى":
طب ياخويا.. خلينا إحنا في البسكويت وخليك إنت في الجرجير!..
إيه ده.. شفتم مين اللي ماشي هناك.. ده "تامر حسني" ومعاه "زينة" كمان!يقوم الجميع من مكانه في سرعة ويفلسعون نحو تيــمو و زوززة!



لو كنت خلاص شفت "تامر حسني" و"زينة" ورجعت تقرأ الموضوع
خلينا نتكلم شوية كمان!

الموضوع المرة دي مش مرتبط بالسؤال التقليدي
"إيه مواصفات فتى / فتاة أحلامك"


سؤالنا المرة دي عن

"ثقافتك العاطفية"

بتكونها من أي سوبر ماركت...

من السينما والأغاني
والممثلين والممثلات
والمغنيين والمغنيات

ولا من
لعيبة الكورة مثلا
ونجوم الصحافة والإعلام؟

ولا
من كتب التاريخ والروايات
والشخصيات اللي بتحقق نجاح كبير في أرض الواقع؟

ولا
من مصدر تاني سري وخاص بيك إنت لوحدك (هتقولنا عليه برضو)؟


يالا بقى شاركونا ردودك وقولوا آرائكم...
اكتبو كدا وفضفضوا شويه
............